Instrucións de MantPro
MantPro rexistra o mantemento da túa planta ou taller: os traballos feitos, os que quedan por facer, os mantementos que se repiten, as máquinas e o stock do almacén. Os técnicos traballan dende o móbil, mesmo sen conexión, e todo chega a este PC ao sincronizar.
Escolle un apartado no índice da esquerda ou busca unha palabra arriba. Esta xanela ábrese tamén coa tecla F1, directamente no apartado da lapela na que esteas.
🚀 Primeiros pasos
- Entra co teu usuario e contrasinal. A primeira vez existe o usuario
admin co contrasinal admin, e o programa obrígate a cambialo.
- Crea os usuarios dos técnicos en Ferramentas → 👥 Xestión de usuarios.
- Dá de alta as máquinas na lapela 🏭 Máquinas. Se xa as tes nunha folla de cálculo, impórtaas con Ficheiro → 📥 Importar dende Excel/CSV…
- Vincula os móbiles con Ferramentas → 📲 Sincronizar App (QR) (ver «Apps do móbil»).
- Escolle o teu país ou rexión en Ferramentas → 🌍 País / Rexión (Festivos) para que o calendario marque os festivos.
👤 Sesión, usuarios e permisos
Cada persoa entra co seu propio usuario, e cada traballo queda asinado con quen o fixo. Un usuario pode ter un ou varios roles:
- Administrador: pode facer todo, incluído xestionar usuarios, configurar o almacén e modificar ou borrar calquera rexistro. É o único que ve os prezos, os custos e todo o relativo a compras (provedores e pedidos).
- Técnico: rexistra traballos e completa pendentes e avisos. Só pode modificar ou borrar os seus propios rexistros.
- Almacén: xestiona artigos e movementos de stock dende a app MantPro Stock.
No menú Sesión podes cambiar de usuario ou pechar sesión sen saír do programa. O teu contrasinal cámbiase en Ferramentas → 🔑 Cambiar o meu contrasinal.
Un administrador crea, edita, desactiva e borra usuarios en Ferramentas → 👥 Xestión de usuarios. Ao borrar un usuario péchanselle as sesións e solta o seu móbil adxudicado, pero o seu nome consérvase nos traballos, movementos de almacén e rexistros que fixo. Non se pode borrar un mesmo nin o último administrador.
📊 Dashboard
Resumo dunha ollada: avisos pendentes, tarefas por facer, rexistros do mes e os indicadores de fiabilidade de toda a planta (MTBF, tempo medio entre avarías, e MTTR, tempo medio de reparación). Debaixo verás as máquinas con máis traballos, as avarías por mes e o reparto de traballos por tipo.
As tarxetas Custo do mes e Custo do ano suman os recambios e a man de obra dos traballos, e debaixo verás as máquinas con máis custo do ano actual (cada unha coas súas submáquinas) e o custo de mantemento por mes dos últimos 12 meses. Se a algún recambio ou traballo lle falta o prezo ou a tarifa, o total quédase curto e aparece con «≥». O detalle por máquina e artigo está en Máquinas → 💶 Custos. Os custos só os ven os administradores.
Os indicadores de fiabilidade calcúlanse cos traballos etiquetados como Avaría e as súas horas de parada.
O botón 👥 Estatísticas por técnico mostra, para o ano que escollas, os traballos de cada técnico (en total e mes a mes), as súas avarías, preventivos e horas de parada, e cantos pendentes ten asignados agora mesmo. En Tipo escolles ver todos os traballos, só os traballos e avarías, ou só o mantemento preventivo. Con 📄 Exportar PDF e 📊 Exportar Excel gárdalo tal e como o ves.
📅 Calendario
Mostra os traballos e os avisos de cada día. Ao premer nun día aparece a súa lista e, facendo dobre clic nun traballo, ábrese para editalo. Ir a Hoxe volve ao día actual.
Os festivos, vacacións, pontes e días libres saen en cores distintas. Xestiónanse co botón Xestión Días ou en Ferramentas → Xestionar Días / Festivos. Os festivos oficiais descárganse sós segundo o país ou a rexión escollidos.
🔁 Avisos (mantementos recorrentes)
Un aviso é un mantemento que se repite: por exemplo, engraxar unha máquina cada mes. Créase con título, data de inicio, frecuencia (diaria, semanal, mensual, trimestral, semestral ou anual), días de marxe, técnico e especialidade.
- Pendente (laranxa): xa toca e está dentro dos días de marxe.
- Atrasado (vermello): pasou a marxe sen facelo. O aviso non se salta: segue aí ata que se faga.
Ao marcalo como feito créase un rexistro no historial e a seguinte data cóntase dende o día en que se fixo de verdade. Co botón dereito podes asignar ou borrar varios avisos á vez.
📟 Por contador: un aviso pode ir polas horas de uso, ciclos ou km dunha máquina en vez de (ou ademais de) por data: «cambio de aceite cada 500 h, avisar 50 h antes».
- Primeiro, o contador: o aviso só pode usar contadores que xa existan. Créaos antes en Máquinas → 📟 Contadores (só administradores). O despregable Contador do aviso lista os de todas as máquinas («Máquina — Nome (unidade)»); se sae baleiro é que aínda non hai ningún, e o propio formulario avísao.
- Campos: marca Por contador ao crear ou editar o aviso, escolle o contador e énchese Cada (cada canto toca, na unidade do contador: 500), Avisar antes (con canta antelación se pon laranxa: 50) e, se queres, Primeira vez a (a lectura á que toca a primeira vez; baleiro é «automático»: a lectura actual máis «Cada»). Os números escríbense como sempre: «1.500» é 1500 e «6,5» é 6,5.
- O que antes chegue: con Ademais, como máximo coa frecuencia por data o aviso consérvase tamén a súa frecuencia (anual, mensual…) e toca o que antes chegue («cada 500 h ou cada ano», para a máquina que se usa pouco). Sen marcalo vai só por contador: non sae no calendario, pero si conta no Dashboard.
- Cores: normal ata entrar na antelación, laranxa dentro dela e vermello ao pasarse. A columna mostra o que falta («1500 h (agora 1440 h)») e o tooltip di cando se chegará ao ritmo de uso actual.
- Data estimada: cálculase co uso medio dos últimos 180 días, desde a última vez que o contador baixou (cambio ou posta a cero). Fan falta polo menos dúas lecturas separadas por un día ou máis e que o contador suba; se non, non se pode estimar e non se mostra.
- Completalo: o diálogo pide a lectura dese momento (opcional, xunto ao tempo traballado). Dela cóntase o seguinte («cada 500 h» desde aí), o traballo queda ligado á máquina e a lectura entra no historial do contador. Se é menor que a anterior, pide confirmar (contador cambiado ou posto a cero).
- Desfacer: desmarcar o completado ou borrar o traballo do historial volve ao ciclo anterior; a lectura segue no historial do contador, pero deixa de contar como inicio do ciclo.
- No móbil os avisos por contador saen igual, tamén sen conexión: o estado (laranxa ou vermello) ten en conta as lecturas apuntadas no móbil que aínda non se enviaron ao PC.
- Os cambios do aviso (contador, «Cada», «Avisar antes», «Primeira vez a») e as lecturas quedan no Rexistro de cambios.
📝 Rexistrar un traballo
Para anotar un traballo xa feito: data, un resumo curto, os detalles, a máquina e as etiquetas (Urxente, Eléctrico, Mecánico, Preventivo, Avaría ou outras que escribas).
- Fotos: arrastra unha foto de antes e outra de despois aos seus recadros, ou fai clic para buscalas. Na colección de fotos podes engadir todas as que queiras, e tamén vídeos (ata 100 MB; grávaos o móbil): saen cunha icona de reproducir e o dobre clic ábreos co reprodutor do ordenador. A foto de antes e a de despois son sempre fotos.
- Se é unha avaría, indica as horas de parada: úsanse para o MTTR.
Preme 💾 GARDAR REXISTRO para gardalo no historial.
🔩 Materiais usados: apunta os artigos do almacén que usaches (saen primeiro os recambios da máquina escollida). Descóntanse do stock e quedan co traballo e o seu prezo. Tamén ao completar un pendente e, para corrixilos, ao editar o traballo no historial: o stock axústase só. O custo por máquina está en Máquinas → 💶 Custo de recambios; o prezo de cada artigo, na súa ficha, e a moeda, en Stock de almacén → ⚙️ Configurar almacén. O custo só o ven os administradores.
⏱️ Tempo traballado: canto durou o traballo (1:30, 1,5 ou 90 min) e cantas persoas. Apúntase despois, ao volver: non hai cronómetro. Tamén ao completar un pendente ou un aviso e, se se esquece, ao editar o traballo no historial. Serve para o custo de man de obra e para as horas de cada técnico nas estatísticas. É opcional: se só foi unha comprobación, déixao baleiro.
📋 Historial
Todos os traballos realizados, organizados por anos e meses. Podes filtrar por técnico e por tipo (traballos e avarías, ou avisos preventivos).
- Dobre clic nun traballo para velo ou editalo, coas súas fotos.
- Co botón dereito podes borrar varios traballos, volver a pendente un traballo rematado por erro e, se es administrador, cambiar o autor de varios rexistros á vez.
Cada cambio queda anotado en Ferramentas → 📋 Rexistro de cambios: quen o fixo, cando, desde onde (PC ou móbil) e que campos cambiaron.
🔍 Buscador
Busca traballos por texto (por exemplo «motor», «fuga» ou o nome dunha peza), por rango de datas e por etiquetas. Os resultados ábrense con dobre clic, igual que no historial.
🔨 Pendentes
Traballos por facer. Cada pendente ten título, detalles, prioridade (Baixa, Media, Alta ou Crítica, coa súa cor), especialidade, fotos e o técnico ao que se asigna.
- ✅ Completar pásao ao historial; podes engadir entón as fotos e os detalles finais.
- 👤 Reasignar cambia o técnico. A lista Ver os de filtra por persoa.
- No móbil, cada técnico ve os seus pendentes co filtro «Só os meus».
🏭 Máquinas
Árbore de máquinas e submáquinas (por exemplo, unha liña cos seus equipos). Ao despregar unha máquina aparecen os seus traballos por anos e meses, e con dobre clic ábrese cada traballo.
- Cada máquina pode ter zona, notas e unha foto, que se ve ao seleccionala.
- Ao seleccionala móstranse os seus indicadores de fiabilidade (avarías, MTBF e MTTR).
- 🏷️ Etiquetas QR xera un PDF de etiquetas (24 por folla A4, de 70 × 37 mm) para pegar nas máquinas. Ao escanealas coa app MantPro ábrese a ficha desa máquina.
- 🔩 Recambios: debaixo da árbore ves os artigos do almacén que leva a máquina seleccionada, cantos leva, cantos hai en stock (en vermello se está por baixo do mínimo) e onde están. Engádeos con ➕ Engadir recambio; con dobre clic vas ao artigo en Stock. No móbil aparecen na ficha da máquina, e en Stock de almacén cada artigo di en que máquinas se usa; tamén podes asocialo ás súas máquinas ao crealo ou editalo.
- 💶 Custos: canto custou o mantemento de cada máquina, sumando as súas submáquinas, por ano: horas traballadas, man de obra (horas × custo da hora) e recambios, co detalle dos artigos da máquina escollida. Expórtase a Excel. O custo da hora ponse aí mesmo (só administradores); cada traballo garda a tarifa do momento no que se apuntou o seu tempo. Os recambios da máquina saen primeiro ao apuntar os usados nun traballo, no PC e no móbil. Só administradores.
- 📟 Contadores: horas de uso, ciclos ou km da máquina seleccionada, para os preventivos por contador. Coa máquina escollida, preme 📟 Contadores:
- ➕ Novo contador (só administradores): nome («Horas de uso»), unidade («h») e, se a sabes, a lectura actual. Unha máquina pode ter varios (horas e ciclos, por exemplo). ✏️ Editar cambia o nome e a unidade.
- 🗑️ Eliminar borra o contador con todas as súas lecturas. Non se pode se algún aviso o usa: antes cambia ou borra eses avisos. Ao borrar unha máquina bórranse os seus contadores e os avisos que os usaban deixan de ir por contador.
- 📟 Apuntar lectura (quen pode rexistrar traballos): anota o valor e a data; tamén se pode facer desde a ficha da máquina no móbil ou ao completar un preventivo por contador.
- 📋 Lecturas mostra o historial; un administrador pode borrar unha mal posta con 🗑️ Borrar lectura.
Cada contador mostra a súa última lectura e o uso medio por día. A lectura que conta é a máis recente por data (non a maior), así que un contador cambiado ou posto a cero segue funcionando; se apuntas unha menor que a anterior pídese confirmar.
📦 Stock de almacén
O almacén organízase en zonas → andeis → baldas → seccións (as seccións son opcionais). Só un administrador pode cambiar esa estrutura, con ⚙️ Configurar almacén.
- ➕ Engadir material: código, nome, descrición, unidade, stock mínimo, localización, foto e prezo unitario (só administradores).
- 📥 Entrada / 📤 Saída: rexistra movementos de stock cun motivo opcional. Unha saída manual non pode deixar o stock en negativo.
- Para mover artigos de sitio, selecciónaos e usa o botón dereito.
- Ao seleccionar un artigo, abaixo ves o seu historial de movementos. 📜 Historial mostra todos os movementos do almacén seguidos.
- 📄 Exportar saca o stock, enteiro ou dunha zona ou andel, a PDF, CSV ou Excel.
- 💶 Prezos: cada artigo pode ter prezo unitario, que se usa para o custo dos recambios usados nos traballos. Só un administrador o pode poñer ou cambiar (tamén desde MantPro Stock). A moeda escóllese en ⚙️ Configurar almacén. O custo dun traballo gárdase co prezo dese momento: se o prezo cambia despois, o xa feito non cambia. O prezo só o ve un administrador: o resto non o ve en ningún sitio, nin no PC nin en MantPro Stock.
- 📦 Revisión diaria (MantPro Stock): cada día a app propón revisar 5 artigos ao chou e avísao cunha notificación. Cóntase cada un e corríxese a cantidade se fai falta; queda anotado quen o fixo e se revisou os 5 (vese en Ferramentas → 📦 Historial de revisións do almacén).
- 🏭 Provedores: o botón Provedores abre a lista de provedores do almacén (nome, persoa de contacto, teléfono, correo e notas) para dalos de alta, editalos ou borralos; só poden usalo os administradores. Na ficha de cada artigo escolles o seu provedor habitual. Se borras un provedor, os seus artigos quedan sen provedor habitual. Os cambios quedan no rexistro de cambios.
- 💶 Prezos por provedor (só administradores): na ficha dun artigo, o botón Prezos por provedor… mostra o último prezo de cada provedor (o máis barato en verde, co que subiu ou baixou) e o historial completo. Podes apuntar un prezo a man, borrar un apuntamento ou usar un como prezo do artigo. Ao dar unha entrada de stock podes indicar a quen se comprou e a que prezo, e queda no historial; se o prezo é distinto do do artigo, preguntaráseche se queres actualizalo (nunca cambia só).
- 🎯 Stock obxectivo e múltiplo de pedido: (só administradores) na ficha do artigo podes indicar ata canto se quere encher ao pedilo (stock obxectivo; se o deixas baleiro, úsase o stock mínimo × o factor de ⚙️ Configurar almacén, 2 por defecto) e o múltiplo de pedido se só se compra en caixas ou lotes. Debaixo verás canto se suxeriría pedir co stock actual, arredondado cara arriba ao múltiplo.
- 🛒 Pedidos (só administradores): en Stock por baixo do mínimo, o botón Pedido suxerido… lista o que hai que pedir (stock obxectivo − o que hai − o que xa está pedido e pendente de chegar), con provedor, prezo estimado e total; podes cambiar cantidades e provedores e desmarcar o que non queiras (podes seleccionar varias filas e marcalas ou desmarcalas á vez, tamén coa barra espazadora). Crear pedidos garda un pedido por provedor, coa súa data. O botón 🛒 Pedidos da lapela de stock lístaos: ✉️ Correo abre o teu correo co texto e deixa o PDF para anexar, 💬 WhatsApp abre o chat co texto escrito (o teléfono do provedor debe levar prefixo, p. ex. +34), 📞 Teléfono mostra o teléfono e o texto para lelo ou copialo e 🖨️ Imprimir / PDF xera o PDF. O texto e o PDF non levan prezos. Cada entrada de stock desconta o pendente dos pedidos (o máis antigo primeiro): pasan a Parcial e, ao chegar todo, a Recibido. Tamén podes marcar un pedido como recibido (sen cambiar o stock), cancelalo ou borralo.
O stock vese en vermello se está por baixo do mínimo e en verde se está por riba.
⚠️ Stock por baixo do mínimo
Os artigos sen stock ou por baixo do seu mínimo (cantidade en vermello) e os que están xusto no mínimo (cantidade sen cor), para telos vixiados. O título da lapela conta só os que están por baixo. Dende aquí podes ir ao artigo, rexistrar unha entrada ou exportar a lista para facer o pedido; ao exportar escolles se incluír ou non os que están xusto no mínimo. Se es administrador, o botón 🛒 Pedido suxerido… calcula que pedir (descontando o que xa está pedido) e crea os pedidos; mira 🛒 Pedidos en «Stock de almacén».
💾 Menú Ficheiro: copias, importar e exportar
- 💾 Backup: copia completa (bases de datos e fotos) nun ZIP, onde ti escollas. Ademais, MantPro fai copias automáticas (ver máis abaixo).
- ♻️ Restaurar: recupera unha copia manual ou unha das automáticas. Substitúe todos os datos actuais.
- 🛡️ Copias automáticas…: MantPro copia el só as bases de datos e as fotos novas no cartafol
backups_auto: sempre ao pechar, cada 2 horas mentres está aberto (se houbo cambios), pouco despois de recibir datos dun móbil e ao abrilo se quedaron cambios sen copiar. Aquí escóllese cada canto e cantas copias se gardan (por defecto, as 10 últimas e unha por día dos últimos 14 días) e, moi recomendable, un cartafol externo (NAS, disco USB ou cartafol de Nextcloud/Dropbox/Google Drive) onde tamén se manda cada copia: unha copia no mesmo disco non serve se o disco falla. Despois de cada copia próbase que se pode restaurar (sen tocar os teus datos). Abaixo á dereita, na barra de estado, vese a data da última copia boa; se algo falla, sae «⚠️ Copias: revisar» en vermello. Para restaurar dende o cartafol externo, usa Restaurar → Restaurar dende unha copia automática e escolle unha copia dese cartafol.
- 🔒 Contrasinal das copias…: cifra as copias de seguranza (a manual, a automática e as previas) cun contrasinal, para que non se poidan abrir se saen do equipo (USB, NAS, nube). Neste equipo restáuranse sen pedilo; noutro, si. Se o esqueces, as copias cifradas non se poden recuperar.
- 📥 Importar dende Excel/CSV…: trae máquinas, artigos, avisos, usuarios, pendentes e historial de traballos antigo dende unha folla de cálculo. Podes descargar un modelo e revisar unha vista previa fila a fila, e antes de importar gárdase unha copia de seguranza.
- 📤 Exportar: o historial a PDF (co logotipo da túa empresa, se o pos en Opcións PDF), CSV ou Excel, con filtro por técnico.
🛠️ Menú Ferramentas
- 📲 Sincronizar App (QR): mostra o código para vincular os móbiles.
- 📱 Instalar MantPro no móbil e 📦 Instalar MantPro Stock no móbil: mostran un QR; ao escanealo coa cámara do móbil descárgase a última versión da app para instalala.
- 🔌 Porto de sincronización…: cámbiao só se outro programa usa o mesmo porto. Despois hai que volver escanear o QR nos móbiles. MantPro usa ese porto e o seguinte (este último, para a conexión cifrada): se hai un cortalumes, ábreos os dous.
- 👥 Xestión de usuarios, 🔐 Sesións de dispositivos (que móbiles están conectados agora mesmo e revogar o seu acceso) e 📋 Rexistro de cambios (quen cambiou que, cando e desde onde: traballos, pendentes, avisos, listas, máquinas, almacén, usuarios, seguranza, copias e configuración, con cada campo antes → despois; pódese filtrar, buscar e exportar a Excel ou CSV).
- 📦 Historial de revisións do almacén (só administradores): quen fixo cada día a revisión dos 5 artigos que propón MantPro Stock, se os revisou todos (✅ completa, ⚠️ incompleta, ❌ sen revisar) e a cantidade que contou fronte á que dicía o sistema. Fíltrase por usuario, período e estado, e expórtase a Excel ou CSV. Se nalgún dos últimos 7 días laborables non se fixo ningunha revisión, MantPro avisa ao abrir e márcao en vermello; abaixo vese que móbiles fixeron revisións (con quen e a data da última).
- 🔐 Cifrado das bases de datos…: garda
mantenimiento.db e almacen.db cifradas (SQLCipher), coa chave no chaveiro do sistema: MantPro ábreas só, pero quen copie os ficheiros ou leve o disco non pode lelas. Ao activalo móstrase unha chave de recuperación que hai que apuntar: MantPro pídea se o chaveiro perde a chave (sistema reinstalado, usuario novo…). O cambio faise ao volver abrir MantPro.
- 📅 Xestionar Días / Festivos e 🌍 País / Rexión (Festivos): días especiais do calendario.
- ☑️ Listas de comprobación…: crea modelos de puntos a revisar (ben / mal / non aplica, ou lecturas coa súa unidade e o seu rango correcto) e asígnaos a avisos e pendentes ao crealos ou editalos. Ao completalos, no PC ou no móbil, pídese encher a lista; queda gardada co traballo (☑️ no historial, ☑️❌ se algo saíu mal; botón dereito para vela) e sae no PDF, no Excel e no CSV.
- 🗑️ Tempo máximo de gardado de traballos…: borra os traballos máis antigos que o tempo que escollas, cunha copia de seguranza previa.
- 🧹 Limpar Fotos Lixo: borra as fotos que xa non usa ningún rexistro.
- 🌐 Idioma e, no menú Aparencia, o tema claro, escuro ou clásico.
📱 Apps do móbil
Hai dúas apps para Android: MantPro (traballos) e MantPro Stock (almacén).
- Co móbil na mesma rede WiFi que o PC, abre Ferramentas → 📲 Sincronizar App (QR).
- No móbil preme Vincular PC e escanea o código.
- Entra co teu usuario e contrasinal. Só fai falta a primeira vez.
- As apps funcionan sen conexión: todo se garda no móbil e envíase só ao volver ter o PC ao alcance.
- Mentres a app está aberta, aínda que sexa en segundo plano, segue sincronizando e mostra unha notificación «Conectado ao PC». Ao pechala de todo deixa de gastar batería.
- En MantPro, o botón de escanear le a etiqueta QR dunha máquina e abre a súa ficha.
- A conexión co PC vai cifrada. Para vincular un móbil novo, actualiza antes a súa app: unha app antiga non entende o QR novo.
- Os avisos e pendentes con ☑️ levan lista de comprobación: ao completalos énchese no móbil, tamén sen conexión.
- Na ficha dunha máquina (ao escanear o seu QR) están os seus 📟 contadores coa súa última lectura: preme Apuntar para anotar a lectura, tamén sen conexión (vese ao momento e envíase ao PC ao sincronizar; se o mesmo envío se repite, non se duplica). Tamén saen os seus preventivos por contador co que falta e o seu estado, e ao completar un deles pódese apuntar a lectura no mesmo paso.
- Se o móbil está adxudicado a un técnico (ver «Seguranza e cifrado»), a pantalla de acceso xa leva o seu usuario e avisa de a quen está adxudicado; outro usuario non pode entrar, salvo un administrador.
- MantPro Stock é só de control de stock: o prezo dos artigos só o ve e o cambia un administrador, e os provedores, os prezos por provedor e os pedidos xestiónanse unicamente no PC.
🛡️ Seguranza e cifrado
- Conexión cos móbiles cifrada (HTTPS): o PC crea o seu propio certificado e a súa pegada vai no QR de vinculación, así que os móbiles só se conectan a ese PC e ninguén na WiFi pode ler os datos nin facerse pasar por el. A conexión cifrada usa o porto seguinte ao de sincronización (5001 se usas o 5000): se hai cortalumes, abre os dous.
- Conexión sen cifrar: mentres haxa móbiles cunha app antiga, o PC tamén os atende sen cifrar. En Ferramentas → 🔐 Sesións de dispositivos, a columna «Cifrado» mostra que móbiles a usan aínda; cando non quede ningún, preme Desactivar a conexión sen cifrar.
- Inicio de sesión protexido: tras 5 contrasinais erróneos seguidos, o usuario queda bloqueado 15 minutos no móbil e un minuto no PC. No móbil, a sesión gárdase no almacenamento seguro de Android.
- Sesións do móbil: cada vez que o móbil conecta co PC a súa sesión renóvase, así que non hai que volver entrar. Se un móbil pasa 60 días sen conectar (perdido, ou de alguén que xa non está), a súa sesión péchase soa; o prazo cámbiase en Ferramentas → 🔐 Sesións de dispositivos. O que tivese sen enviar non se perde.
- Móbil adxudicado a un técnico: en Ferramentas → 🔐 Sesións de dispositivos, selecciona unha sesión e preme 📲 Adxudicar móbil a un técnico…. Desde entón ese móbil só deixa iniciar sesión ao seu técnico (os administradores poden entrar sempre) e a app déixalle posto o seu usuario na pantalla de acceso. Vale para MantPro e MantPro Stock á vez (comparten o identificador do móbil), así que o mesmo técnico pode usar as dúas apps no mesmo móbil. Fai falta que o móbil conectase coas apps actualizadas; as sesións xa abertas non se pechan. A columna «Móbil de» mostra a quen está adxudicado e o cambio queda no rexistro de cambios.
- Fotos comprobadas: o PC só garda as fotos dos móbiles se son imaxes de verdade e de 30 MB como moito, e pola conexión cifrada só se poden ver coa sesión iniciada.
- Bases de datos cifradas (Ferramentas → 🔐 Cifrado das bases de datos…, desactivado por defecto): quen copie os ficheiros ou leve o disco non pode ler os datos. MantPro ábreos só coa chave do chaveiro do sistema. Apunta a chave de recuperación que se mostra ao activalo e gárdaa fóra do ordenador.
- Copias cifradas (Ficheiro → 🔒 Contrasinal das copias…): as copias que saen do equipo (USB, NAS, nube) non se poden abrir sen o contrasinal. As copias levan os datos sen o cifrado das bases de datos, para poder restauralas noutro equipo: protéxeas con este contrasinal.
- As fotos non se cifran. Para protexer todo o equipo, usa tamén o cifrado de disco (BitLocker en Windows, LUKS en Linux).
❓ Problemas frecuentes
- O móbil non conecta: comproba que o PC e o móbil están na mesma WiFi e que MantPro está aberto no PC. En Windows pode facer falta permitir o programa no cortalumes. Se o PC cambiou de IP, volve escanear o QR.
- «O porto está ocupado»: adoita ser outro MantPro aberto. Pechao ou cambia o porto en Ferramentas → 🔌 Porto de sincronización…
- Alguén esqueceu o seu contrasinal: un administrador pode restablecelo en Ferramentas → 👥 Xestión de usuarios.
- Non chega a notificación diaria ao móbil: en Xiaomi, OPPO/Realme ou Huawei pon a app en Batería → Sen restricións.
- Equivoqueime ao restaurar ou importar: no cartafol
backups_auto están as copias previas.
- Abaixo á dereita sae «⚠️ Copias: revisar»: a última copia automática fallou, non se puido restaurar na proba ou non se puido mandar ao cartafol externo (disco USB sen conectar, NAS apagado). Prémeo para ver o motivo, arránxao e preme 💾 Facer copia agora.
- Ao abrir MantPro pide unha chave de recuperación: as bases de datos están cifradas e o chaveiro do sistema xa non ten a súa chave (sistema reinstalado, outro usuario…). Escribe a chave que apuntaches ao activar o cifrado. Se non a tes, saca
mantenimiento.db e almacen.db do cartafol de datos, abre MantPro e restaura unha copia.
- «Demasiados intentos fallidos»: agarda o tempo que indica o aviso ou pídelle a un administrador que restableza o contrasinal.
- Ao restaurar pide un contrasinal: a copia está cifrada co contrasinal das copias do equipo onde se fixo (ou cun anterior). Sen el non se pode restaurar.
- «Este móbil está adxudicado a …»: o móbil está reservado a un técnico e só el (ou un administrador) pode entrar. Para liberalo ou cambialo, un administrador usa Ferramentas → 🔐 Sesións de dispositivos → 📲 Adxudicar móbil a un técnico… e escolle outro técnico ou «Ninguén (móbil libre)».
- Non vexo prezos, custos, provedores nin pedidos: só os ven os administradores, no PC e nas apps. Pídelle a un administrador que o consulte.
- WhatsApp non abre o chat co provedor: o seu teléfono debe levar o prefixo internacional (p. ex.
+34 600 000 000). Corríxeo en 🏭 Provedores; sen prefixo, WhatsApp pode non recoñecelo.
- Un artigo non sae no pedido suxerido: só saen os que están por debaixo do mínimo e teñen stock mínimo ou obxectivo, e non se o xa pedido cobre a falta. Os que non teñen provedor habitual saen sen provedor: escolle un antes de crear os pedidos.
- Fixen unha entrada de stock e o pedido non baixou: a entrada só desconta os pedidos abertos dese artigo (non os cancelados nin os xa recibidos), primeiro os do provedor indicado e despois o máis antigo. Os axustes de inventario non descontan pedidos, e «marcar recibido» non cambia o stock.